تجاربي الشخصية ف التنمية البشرية

السلام عليكم

طبعا دا مش اسم كتاب دي مجموعة من الحاجات اتلي انا اتعلمتها من اتلتنمية البشرية
طيب واحد هبيقول لي انت بتكتب خواطر سعادتك وتجاربك ليه

فارد عليه واقوله بكل بساطة
كده
قصدي ان فيه ناس كتيره بتتكلم معايه عن ان التنمية والsoft skillsوالhuman touch دي كلام كتب وحاجات فارغة ملهاش لازمة وانت قاعد بس تتكلم زي البغبغان--الي هو انا يعني--وانك ما استفدتش منها حاجه خالص غير انك بتقعد تتكلم وخلاص وتوجع ف دماغنا--دا الي هو انا برضه--

حقيقي يا جماعه الكلام دا مش كلام كتب ولا كلام بتكلمه وخلاص وعشان كده قررت اعمل الركن دا اقول لكم فيه وخصوصا --اخواتي الصغيرين--ازاي الحاجات دي اثرت فيه وغيرتني تماما

وعشان كده قررت اكتب الحاجات الي استفدتها لعللكم تستفيدوا منها انتم كمان وتطبقوها شخصيا
هكتب كل مرة درس استفدته واخطائي وياريت اسمع منكم ردود عشان اكمل

هبدا اول واهم درس اتعلمته ف حياتي


"الثقة ف النفس"

هقولكم الاول يعني ايه انسان واثق من نفسه
1-عنده اهداف محدده عايز يحققها
2-لايستمع لاراء الاخرين ويصدقها دائما
3-يعلم ان حياته وحياة كل فرد اخر متميزة ومختلفة وبالتالي لايحسد الاخرين ولاينتقدهم ولايقلل من شان نفسه
4-عندما يفشل لا يخلق الاعذار بل يحاول مرة اخري

احفظوا الحاجات دي كويس

طيب وبعدين
كان فيه عالم نفس اتخصص ف موضوع الثقة بالنفس فشوفوا بقي عمل ايه
اولا كتب كتاب سماه psychology of self-esteem
وبعدين لقى الموضوع اكبر من كده فكتب كتابBreaking Freeالانطلاقة الحرة
وبعدين لقى الموضوع اعمق من كده فكتبdisowned selfالنفس الحرة
وبعدين الموضوع كبر فكتب honoring the selfتقدير النفس
وانتم عارفين الباقي الموضوع خرج بره ايده خالص فكتب كتابين ورا بعض
how to raise your self esteemوبعدينpower of self esteem

طيب وايه يعني
لا
دا يعني كتير قوي ,مثلا لو قلت لك ممكن تكون بكرة مدير مستشفي,بلاش,ممكن تغلب بطل العامل ف الكاراتيه,بلاش ممكن تعمل مؤسسه صحية عالمية,ممكن.........

عارف اجابتك هتكون ايه لا طبعا وبعدين هتقعد تقولي شوية اعذار وظروف ومشاكل ووووو

بس الحقيقة اننا نقدر,حقيقي نقدر
هتقولى يعني ياعم انت ممكن تعمل مؤسسة صحية عالمية ف مصر ,ياعم شكللك كده سكران بجد

ولا انا ممكن اغلب بطل العالم ف الكاراتيه--ياعم اقعد ساكت احسن لاضربك انته

معلش اسمعني للاخر

انا هنا بحكيلك تجربتي الشخصية
يعني مش هقولك جنكيز خان ولا روميل ولاطلعت حرب ولا حتي احمد عز

هقولك حاجات انا عشتها بنفسي
1- لما كنت بلعب كونغ فو--انتم عارفين طبعا اني بطل--المباراه الي كنت فيها بنزل مهزوز كنت بنضرب فيها للصبح وصدقوني كنت بشوف الهزيمة ف عيون خصمي--ودي تكنيكات هنتعلمها بعدين--والمباراه الي كنت بنزل فيها واثق من نفسي واقعد اتنطط على الي قدامي مهما تكون قوته واقوله مثلا"مستعد للضرب""هتستحمل العلقة"كنت حتى لو هو جامد بعرف اسد معاه ف المباراه--وبرده بشوف النصر ف عيون خصمي--
وبعدين اتعلمت من الهندسه النفسية تكنيكات الثقة بالنفس ووو كلام هنحكي فيه بعدين

2-ف مجال المبيعات لما كنت بنزل لشركات كبيرة واعرض عليها منتجاتنا صدقوا حتى لما بكون مع احد المديرين لما كنت بتكلم بثقة واعرض عليه بقوة الي ممكن يستفاد منه كان على الاقل لو مفيش شغل بحترمنا كشركة

3-اما ف الجانب السلبي فمثلا عدم ثقتي ف نفسي ف المجال الطبي--وانتم عارفين طبعا اني بكره كليه الطب زي مبكرة فرانكشتين--مخلنيش اعيش حياتي كويس ف الكلية ولا اتعرف على الاوائل الا ف السنتين الاخيرتين
لما بدات اكتشف نفسي و صدقوني كان ناس كتيرة بعد كده بتطلب تتعرف عليه
وطبعا عدم ثقتي بنفسي مثلا مخلنيش اسال الدكاترة او اعمل علاقات كويسه معاهم ومش عارف كرهي للكلية هو كان السبب في عدم ثقتي بنفسي ولا عدم ثقتي بنفسي هو السبب ف كرهي للكليه
طبعا انا دلوقت كسرت الحاجز دا وبستعد اتكلم قدام الداكترة كلهم ف ورشة العمل القادمة لتطوير التعليم ومش قدام دكتور ولا اتنين لا قدام ناس كتيرة عمري متخيلت اني اتكلم قدامهم
بقولكم الكلام دا عشان حاجتين اولا متبقوش زي واتعرفوا على الدكاترة والطلاب الاوائل و كل الناس وعيشوا حيلتكم فيها ثانيا حبوا الكليه وهتحسوا ساعتها يالفرق--ومستحيل تحب الكلية طبعا قبل خامسة طب--

4-قبل كده ايام الثانوي كان مستحيل اتكلم حتى لو قدام اتنين وقعد اشرح وجهة نظري لكن بعد شوية دورات وشوية تدريبات ومحاضرات زى-مهارات العرض,الاقناع,العلاقات العامة,الهندسة النفسية--وبعد كتير من الفشل والغلطات الساذجة جدا جدا ممكن دلوقت اتكلم قدام الناس كلها


الي عايز اقوله

حدد اهم الصفات السلبية فيك وحللها عشان تعرف هي حقيقة ولا خيال
شيل كلمة مقدرش من قاموسك
صاحب الناس الناجحة
فكربعقلية الناجحين
جرب ومتخفش حتي لو هتغلط
تشجع وكن مبادرا
متخفش من حد حتى لو انت الاضعف
كن مسئولا عن حياتك وقراراتك
لو عيشت طعم النجاح والثقة بالنفس مرة صدقني مستحيل ترجع عنهم
قدر نفسك وامن بيها"الناس بتحب الواثق من نفسه وتحترمه جدا"
"اكتشف صوتك والهم الاخرين ليكتشفوا اصواتهم"العادة الثامنة-للعظماء

حدد حاجة كنت عايز تعملها وخايف من نتايجها او خايف متقدرش تنجزها واتحدي نفسك وحاول وشوف نتيجة

شوف انا مش هقدر اعلمك اي حاجة لو متعلمتشش الدرس دا"ثق بنفسك"وصدقني كل الي جي بعد كده مش هيفيدك لو مطبقتش الدرس ده

عايز اسمع منكم
اكتر مرة كنت واثق فيها من نفسك
ايه اهم حاجة بتمنعك عن الثقة بامكانياتك
اكتر مرة كنت ضعيف فيه

مستني ردودكم

اكتر مرة كنت واثقه من نفسى بعد ما قريت التوبيك ده
ايه اهم حاجة بتمنعك عن الثقة بامكانياتك الخجل وعدم القدرة على التحدث مع الاخرين
اكتر مرة كنت ضعيف فيه
فى سنه ثالثة ثانوى السنه دى لان مكنش عندى امل بعد مطلعتش من الاوائل السنة الى فاتت
بالرغم ان مجموع كان كويس بس بعدها فقدت الثقه فى نفسى وحست انى بقيت فاشله وبقا التفوق حاجة صعبة بالنسبة ليا بعد مكان اسهل واحب حاجه ليا فمثلا الحمد لله انا داخله كليه صيدله بتمنى اكون معيده بس لما بفكربقول ياه معيده خلاص دى عدت عليا انا استحاله ابقا معيده لانى مبقتش متفوقه فى ناس تانيه تقدر لكن انا وبقت احلامى كلها غيرقابله للتحقيق بسببعدم الثقه فى النفس

اكتر مره ببقى واثقه فيها من نفس لما ببدا فى اى حاجه علشان اعملها بس هما يومين تلاته اول ما الاقى تجاهل الى حواليه بافكارى و بشغلى و ياريت بلاق نقض علشان استفيد و اضبط الموضوع لا بيبقى تجاهل على طول مش بعرف اكمل .
الى بيمنعنى تكرار الفشل.
اكتر مره كنت ضعيفه السنه دى علشان بدات اخد بال من الغلط الى عندى و بحاول اصلحه و للاسف فشلت فى بعض الحاجات.

اكتر مة كنت واثق فيها من نفسى تقريبا كانت ايام اعدادى اخدت فيها مركز اول جمهورية فى مسابقة طبعا كنت واثق من نفسى موووووووووووت وايام اعدادى وثانوى كنت ناجح فى دراسى وكدا بس المشكلة ان ناس كتير مكنتش بتقدر دا خصوصا ان بابا كان مدرس فى نفس مدرستى فى اعدادى ومامتى كانت بردو فى ابتدائى فلما كنت اعل اى نجاح الناس كانت دايما تقول باباك هوا اللى وصلك فده كان بيعملى احباط اما فى الكلية فال فشل فى سنة اولى خلانى اكمل فشلى بس يمكن السنادى ادتنى شوية ثقة بنفسى علشان تقديرى كويس بس بردو بلاقى اللى حواليا احسن فبرجع احس انى اقل من اللى حواليا او احس انى قصرت
بردو موضوع الثقة فى النفس دا محتاج اظبطه اوى مع نفسى
اكتر موقف اكون ضعيف فيه لو حد خلانى اعمل حاجة مكنتش عملتها قبل كده بحس انى ممكن اغلط وبخاف انى احاول بس انا بحس انى لو حاولت هعمل كويس يعنى عندى ثقة فى امكانياتى بس فى خوف من البداية

اولا بشكر كل الناس الي اتكلمت عن رايها ف موضوع الثقة

الحقيقة يا جماعة ان اكتر موضوع لمسته من خلال خبرتي-المتواضعة طبعا--ف مجال التدريب واحتكاكي مع الشباب هو موضوع فقدان الثقة ف النفس وانك ممكن تعمل حاجه ف الدنيا دي

طبعا يا سارة مينفعش تقولي ان احلامي مش هتحقق بسبب بسيط جدا انك لسه فعلا قدامك عمر طويل جداااا تعيشيه فمش معقول من دلوقتي تقولي ان احلامي ضاعت
اما بالنسبة لمشكلة الخجل وعدم القدرة على التحدث امام الاخرين فدي امرها اسهل مما تتخيلي كمان تلات اربع سنين هفكرك بالي بقوله دلوقت

رشا بتقول انها لما بتلاقي الناس بتنقضها بتتضطر تبعد عن الي بتعمله حقيقي دي نقطة مهمة جدا انا كمان كنت كده
لكن اتعلمت من البرمجة ان"لاتنتظر المساعدة من الناس فالناس بحاجة لمن يساعدها" صدقيني الناس مش بينقضوا من منطلق قوة ولا معرفة اكتر ولا خبرة اعمق الي اتعلمته انهم بينقضوا عشان قله الخبرة والخوف
بالنسبة لتكرار الفشل فدا اقصر الطرق للنجاح اولا لان مفيش حد بيتعلم بالسهل ثانيا غلطك دلوقتي معناه نجاح بعدين وخبرة متقدرش بتمن ,اتذكر واحد لما راح يقدم نفسة ف احد الوظائف المدير قاله ايه خبراتك فرد عليه "اكتر من عشرين شركة فاشله" فقاله وايه الي جابك هنا قاله "كل خبرات الفشل دي هعرف ازاي ابعدها عن الشركه هنا"

اما بالنسبة لميدو فموضوع الكلية دا متحطوش ف دماغك صدقني فيه حكايات عن دكاترة كتيرة قوي كانت فاشلة جدا ف الكلية ولما خلصت بقت ممتازة واكتر واحد طبعا هو مجدي يعقوب الي لما رجع يعمل عمليات ف القصر العيني اصر ان الدكتور الي قاله "انت متنفعش تبقى جراح خالص"اصر انه ميدخلش القصر العيني طول ماهو موجود فمتقلقش من ناحية الكلية خالص لما تخلص هتكتشف ان دكاترة الكلية دول حبة؟؟؟؟؟ بلاش اما بقى زمايلك الي اعلى منك فدى شئ طبيعي وياريت تفتكر كلامي عن الواثق من نفسه "يعرف ان حياته وحياة الاخرين فذه متميزة لاتتكرر"
خوفك من البداية دا مش عندك بس دا دي حاجة عندنا كلنا ودي نتاج تربيتنا الغلط هشرح الموضوع دا بالتفصيل بعدين

davinci كتب:

"لاتنتظر المساعدة من الناس فالناس بحاجة لمن يساعدها" صدقيني الناس مش بينقضوا من منطلق قوة ولا معرفة اكتر ولا خبرة اعمق الي اتعلمته انهم بينقضوا عشان قله الخبرة والخوف
الواثق من نفسه "يعرف ان حياته وحياة الاخرين فذه متميزة لاتتكرر"

الله عليك بجد يعني أنا بحب كلامك و إنت من الناس إللي سماع كلامها متعة

ghallab55 كتب:

الله عليك بجد يعني أنا بحب كلامك و إنت من الناس إللي سماع كلامها متعة

عندك حق و الله

rony كتب:

ghallab55 كتب:

الله عليك بجد يعني أنا بحب كلامك و إنت من الناس إللي سماع كلامها متعة

عندك حق و الله

انا متشكر كتير على مروركم