يعني ايه تنمية بشرية وتطوير شخصي

السلام عليكم


الحقيقه يا جماعة انا سعيد اني بكتب ف المنتدى بتاعنا و طبعا الموضوع الي انا بيتكلم عنه جديد ولذيذ -حقيقي هو مش جديد قوي زي مهقولكم بعد كده لكنه بالنسبة لنا جديد يعني مسمعناش عنه قبل كده مفيش حده عطاه لنا ف المدرسة او الجامعه او التلفزيون او حتى الكتب والجرايد الي بنقراها
عشان كده انا هبدأ معاكم م البداية ونتكلم عن التنمية من قبل الميلاد لغاية القرن الواحد والعشرين وياريت اسمع منكم تعليقاتكم

نبدأ ..طقطق لي ودنك وصحصح معايا

شوف يا سيدي كان يامكان ايام زمان يجي من تلات الاف سنه كده كان فيه الجماعة الرومان وكانوا ناس بتاعة حرب و تكوين دول ومستعمرات و ترتيب شئون الحكم ,فكان لازم القائد بتاعهم يكون قوي الشخصية والمعرفة ..وعشان كده ف احد الحكايات الي عنهم تسمع مثلا عن اختبار القيادة عندهم عامل الزاي ..تخيل
كان لازم على كل واحد عايز يبقي هرقل انه ينجح ف اختبار مكون من جميع رؤساء الاقاليم وكل رئيس اقليم يقوله عدد الجنود عند وعدة الحرب وسكان اقليمه وعدد العبيد ف اقليمه والامراء وووو...وكل شهر يجتمع بيهم ويسالهم عن كل الحاجات دي لكل قائد ولو نسى مثلا الكلام بتاع الشهر الي فات او نسى اي عدد من الي اتقال له لا يسمح له بان يكون هرقلا المشكلة الاكبر ان عدد قواده كان حوالي تلتمية قائد ف الامبراطورية كلها تخيل بقى لو انت مكانه كنت هتفتكر ايه ولا ايه(دي رواية حقيقية ف احد كتب بوزان) المهم فالرومان اول ناس كانوا بيهتموا بالذاكرة وكان زيهم اليونانيين يعني بيهتموا باسماء مدنهم وشعراءهم وقوانينهم ووو... وعغشان كده ف التطوير الشخصي بنهتم بيها قوي وبهتم بتكنيكاتها لانها بتدي الانسان قوة رائعة لما يكون عنده ذاكرة قوية ..طيب خلوني اسالكم شوية اسأله
تعرف ايه عن فنون تقوية الذاكرة
قريت عن الmnemonics قبل كده
ازاي تطور ذاكرتك و هل صحيح ضعف الذاكرة مش ممكن نعالجه

مش هجاوبكم دلوقت


وبعدين الفراعنة مش عارف شكل التطوير والاهتمام بالبني ادميين عندهم كان عامل ازاي

ندخل ف العصر االي بعد كده
الحضارة البيزنطية ..مش مهم هي كمان
الحضارة الهندية القديمة ..عديها

الحضارة الاسلامية والحقيقة دي كان فيها اهتمام غير عادي بالانسان ودي حبة امثلة
النبي ينهي الام عن الكدب على ابنها
النبي يوظف اصحابة بفعالية...عبدالله بن انيس وعبد اله بن عتيك للمخابرات وزيد بن ثابت للعلم(كان يتحدث 13 لغه ف بعض الاقاويل)
النبي يستشير اصحابة
النبي يتعاون مع الاخرين حتى لو كانوا مشركين ويحترم ادميتهم
وووووو...هنكمل امثلة بعدين بس هربطهالكم بالتنمية ف الغرب لان دا يهمني قوي


الي عايز اقوله انه بعد اختلاط الحضارات الاسلامية بالبيزنطية الي انتهت على يد الحضارة الغربية الكاثوليكية واخروج اوروبا من عصور الظلام الي عصر النهضة (حوالي القرن 12)كان المسلمون بيدخلوا عصر التخلف(احد الكتاب المصريين الي مش فاكر اسمة بيقول ان المسلمين كل 700 سنه بيحصل لهم تغير ف الحضارة يعني اول 700 سنة كانت عصر المجد وتاني 700 سنة كانت عصر انحدار وتالت 700 سنة يعني ممكن نبقي ف بداية نهضة) وبعدين اوروبا مسكت شعلة قيادة الانسانية لحد القرن ال19 لما امريكا بدات تخرج للعالم بعد الحرب العالمية وتقود الدنيا وتشيخ اوروبا بفلسفتها التنويرية ..وبعد لما امريكا مسكت شعلة قيادة العالم لحد اواخر القرن العشرن بدانا بقي نسمع عن مصطلحات جديدة ومفاهيم مثل العولمة.الاقتصاد الحر.التكتلات الدولية ..الشركات عابرة القارات.واسماء تنويرين من دول العالم الثالث زي فريري البرازيلي و ناس كتير هنقول عليهم بعدين
المهم انه بنهاية القرن العشرين كانت عملية تطوير الافراد بدات تاخد اهتمام غير عادي ..هشرحة بعد شوية سطور


عصر الرعي..عصر الزراعة..عصر الصناعة..عصر المعلومات..والان عصر الحكمة

دا التطور الطبيعي ( مش للحاجة الساقعه) للحضارة الانسانية بيقولو ا ان الانسان انتظر كتير ف عصر الزراعة لحد القرن 18 وبعدين دخل عصر الالات والصناعه لحد القرن ال19 ومنتظرش الانسان كتير يعني اكتشف الغرب اولا ان القوة العسكرية هي الحل ولكن بعد الحربين العامليتين اكتشفوا ان الحرب والقوة مش بتحل حاجه فسابوا خيار الحرب للعالم الجاهل ( الي هو احنا يعني الدول المتخلفة بس هي الي بتحط خيار الحرب الولا ودي حقيقة دلوقت ف الساسية) فقالو خلاص االموارد الطبيعية والصناعية هي الحل للتقدم بس الكلام مطلعش مضبوط بدليل ان الشرق الاوسط فيه مصادر طبيعية كتير ورغم كده ..بلاش اقول..وعكسهم كوريا واليابان معندهمش اي موارد ورغم كده ميت فل وعشرة..وطبعا كان الحل الصحيح هو ان الانسان هو الحل للتقدم ..وبدانا نتكلم عن تقرير اسمه التنمية البشرية للامم المتحدة وصدر ف اواخر السبعينات ونسمع عن البرنامج الانمائي للامم المتحدة

المعومات تضاعفت مرةتين من بداية الخلق لاوئل السبعينات
المعلمومات تضاعفت مرة اخري من السبعينات للتسعينات
المعلومات تضاعفت مرة تالته من التسعينات لوائل 2000
المعلومات تتضاعف الان مرة كل 18 شهر تقريبا

اذا دخلنا عصر المعلومات

فما هو عصر المعلومات

كل الشركات والدول والافراد الاقدر على الحصول على معلومات كافية وغزيرة في اي مجال من مجالات الحياه سوف تكون الاقدر على الانتصار والتقدم ممن الدول الاخري
الدول التي لديها سلاح عسكري قوي تنتصر
الشركات التي لديها معلومات تصنيعية عالية تبيع اعلى
الشخص الذي يصنع حتى ايس كريم اطعم هو الاكثر مبيعا وشهرة

وبعدين ايه حكاية عصر الحكمة
انتهي موضوع ان الي يعرف اكتر هو الي يكسب اكتر بقى الموضوع الي يفهم اكتر هو الي يكسب يعني مثلا هل لازم ف عصر الحكمة اكون انا احسن شركة تصنيع كمبيوتر ف العالم ..ف عصر المعلومات اه ..ف عصر الحكمة لا..يعني ايه ..احسن شركة هى الي بتعرف تجمع كمبيوتر صح من كل مصانعا ومورديها ف العالم ..يعني الشاشة من الصين البوردة من المانيا الموس من تايلاند ..الخ
هو دا عصر الحكمة ازاي تستخدم المعلومات لحسابك عشان تعرف تكسب منها والكلام دا ينطبق على كل حاجة علاقات مع الناس ف البيت ف الشغل ف العمل التطوعي حتى..هنتكلم بعدين بالتفصيل عن عصر الحكمة


وفين بقية الكلام عن تقنيات التطور البشري والادراة الحديثة والابحاث التعليمية الحديثة
والقيم والمعتقدات وتغيير السلوك


دا الي هنعرفه ف الحلقة الجاية

تصبحوا على خير

كلام جميل يابو حميد بس

مستنى الباقى

وانت من اهل الخير

شكرا ياdavinciعلى التوبيك الرائع بجد الركن ده بتاع التنميه البشريه تانى افضل ركن انا بحبه فى المنتدى وبقرا مواضيعه بجد شكرا
انا مش عارفه حضرتك بسحضرتك ممكن تكون داحمد سكران الى بيدينا وبينظم دورات التنميه البشريه فى النقابه لو حضرتك قعلا الف شكرا لانك من احسن الماحضرين الى استمعتله وشكرا للجنه على دورة التنميه البشرية ودورة presentataion skills بجد غيروا فى طريقه تفكيرى ونظموهاو بقيت اقدر احاضرقدام اىحد شكرا

أيوه هو دكتور أحمد سكران

احنا وقفنا فين

اه

شوف يا سيدي منك ليه

انا اتكلمت عن عصر الحكمة ليه وعن عصر المعلومات ليه قبل مدخل ف صلب الموضوع

عشان لازم تفهم العصر الي انت عايش فيه وازاي الناس بتفكر والدنيا حوليك ماشية ازاي وعشان"اوربا متقدمتش الا لما ركبت البحر"

اكمل كلامي
دلوقت هتكلم ف نقطتين مهمين :التنمية الشخصية وبدايتها--ظهور مصطلح التنمية البشرية

اولا:التنمية الشخصية وبدايتها

طبعا وصلت معاكم لحد القرن العشرين وان امريكا خدت مشعل الحضارة الانسانية ودا كان ليه معاني كتير فالحياة ف امريكا بقت سرعتها كبيرة والناس معدش عندها وقت للعلاقات الانسانية ولا لاي مشاعر فكان بداية كتب التنمية الشخصية بمجموعتك كتب لاحد الكتاب --الي مش فاكر اسمه دلوقت--وكانت بتتكلم عن النجاح ف الحياة او الHUMAN TOUCHزي مبنقول وكانت الكتب دي ف العشرينات

وبعدين كانت الانطلاقة الكبرى ف التلاتينات على يد ديل كارنيجي الي بدا سلسلة دروس ف جمعية الشبان المسحيين عن النجاح والحياة والعلاقات الانسانية وحب الحياة وبعدين عمل كتب مهمة جدا لحد الان بتتباع

--كيف تكسب الاصدقاء وتؤثر في الناس--والكتاب دا حقيقي اثر فيه كتير بس هاجل الكلام عنه في تجاربي الشخصية

والكتاب الثاني كان--دع القلق وابدا الحياة--الي برضة اثر فيه جامد جدا جدا وقريته خمس مرات بجد --بس لما قريت كتاب جدد حياتك للغزالي بعد كده اكتشفت حاجات تانية هكلمكم فيها بعدين--

وبعدين الكتاب التالت عن فن الخطابة --وهو كتاب جامد جدا مقريتش زيه الا كتاب روسي عن فن الخطابة برضه بس مش فاكر اسم الكاتب--

المهم بدا بعد ديل كارنيجي حركة قوية اتجهت لمفهوم التنمية الذاتية SHAM باختصار وطلعت كتب كتير جدا انا يمكن اكتر حاجة اثرت فيه منهم كتب لواحد اسمه اوريزون سويت ماردن

وبعد كده ظهر عندنا اسماء للناس الي بتتكلم في الحاجات دي
MOTIVATOR ويتكلم عن الحوافز ولانجاز ووو وباين من اسمه
COACHالمدرب الشخصي يعني واحد يقعد معاك ويعلمك اصول وقواعد النجاح وتتصل بيه ف اي وقت لو كان عندك مشكلة والمصطلح دا اخترعه الامريكان ف الستينات ومهمته الجانب النفسي
TRAINERودا المدرب ---حاجة مفهومة طبعا--

المهم التنمية الذاتية بدات تكبر جدا وتنتشر ف بداية التسعينات وكل يوم تخرج عينا المطابع باسماء كتب كتيرة عن النجاح والحياة والتفوق والتحفيز والانجاز والابداع

شوف الموقع دا وقولي ايه رايك ف العناوين
http://www.alkhulasah.com/

اهكمل كلامي عن ظهور مصطلح التنمية البشرية بعدين

سلالالالالالالالالالالالالالالالالالالالالالالالالالام

حلو اوى يا د . احمد اسلوب حضرتك رائع بيضيع شويه غلاسه الكلام التاريخى دة

أحلي حاجة في مواضيعه هي الأسلوب

الكلام لو كان بأسلوب تاني مكانش حد هيقرا المواضيع دي

شكرا يا د.ايناس
شكرا يا غلاب


بس انا معتقدش ان المواضيع دي تقيلة بالعكس الكلام فيها ممتع جدااا

لا صدقني المواضيع إللي من النوع دا بتبقي تقيلة علي معظم الناس

بس إنت بتعرض بأسلوب حلو قوي و مثير في حد ذاته .

انت عارف رايي فيك يا حمد يا سكران

بس للاسف اغلب كلامك دة انا عارفة

وبعتبرة استرجاع للذاكرة

فعشان كدة مش بعلق علية

بس


اللي ينور
شغلك نضيييييييييييييييف

والي الامام دائما